Timu za taifa za vijana za mchezo wa soka kutoka Ethiopia, Tanzania na Sudanzitawakilisha ukanda wa CECAFA katika mzunguko wa tatu na wa mwisho kufuzu fainali ya mataifa bingwa barani Afrika kwa vijana wasiozidi miaka 17 itakayofanyika nchini Madgascar mwaka 2017.
Serengeti Boys ya Tanzania ikicheza katika uwanja wa nyumbani wa Chamazi nje ya jiji la Dar es salaam, mwishoni mwa wiki iliyopita iliishinda Amajimbos ya Afrika Kusini mabao 2-0, na kufuzu kwa jumla ya mabao 3-1 baada ya sare ya bao 1-1 katika mchuano wa kwanza.
Vijana wa Sudan wakiwa nyumbani jijini Khartoum, walifuzu kwa jumla ya mabao 2-0 baada ya kuishinda Zambia mabao 2-0 nyumbani baada ya mchuano wa kwanza kutoka sare ya kutofungana.
Ethiopia nayo iliwaondoa Misri baada ya jumla ya ushindi wa mabao 5-2, nyumbani wakipata ushindi wa mabao 2-1 na 3-1 ugenini wiki mbili zilizopita.
Baadhi ya ratiba ya mzunguko wa tatu nyumbani na ugenini mwezi Septemba:
Tanzania vs Congo
Sudan vs Cameroon
Niger vs Gabon
Ghana vs Ivory Coast
Angola vs Comoros
